كل يوم بيعدى مبيرجعش تانى

مبدع NEW عدد الرسائل : 8 تاريخ التسجيل : 15/10/2008

موضوع عجبنى قلت أسرده هنا .. أسأل الله الثبات والفائدة

بيعدى علينا سنين كتير .. السنين دى هيا عمر الانسان

كل مرحلة وليها حاجات خاصة

أقصد أهدافك حياتك عاداتك اهتماماتك .. وأكيد كل مرحلة مختلفة عن التانية

ودا طبيعي جدا لان المراحل دى كلها لازم تختلف عشان تكمل بعضها

عشان تكون عمر إنسان

طيب فى ناس اتولدت وماتت وفى ناس عايشة وهتموت وفى ناس ان شاء الله هتتولد وبردو هتموت

( كل من عليها فان .. ويبقى وجه ربك ذو الجلال والإكرام )

طيب فى ناس ماتت واتنست ماعملتش حاجة نفتكرها بيها

وفى ناس ماتت ولسة عايشة .. عايشة بفكرها وباهتمامها انها تأثر فى الكون وبنية خالصة لربنا

وكمان الناس دى عايشة بإرادتها القوية

سنين كتير عدت .. وسنين كتير عاوزينها تعدى عشان نوصل لهدف معين

بس هيا السنين اللى عاوزينها تعدى دى مش محسوبة من عمرنا

هل صح .. اننا نفضل نعد الايام واحنا عايشين حياة روتينية مستنيين لحظة معينة

طب والايام اللى عدت دى .. فى حقيقة كلنا بننساها

ان كل يوم بيعدى مبيرجعش تانى

كل يوم بيعدى دا يوم من عمرنا اللى هوه أيام معدودة وهكرر مش هيرجع تانى

وكل يوم بيعدى بيقربنا من يوم كلنا هنشوفه ( يوم الرحيل من الدنيا )

يااااااه .. دا اليوم مهم أوى

وكمان دانت هتتحاسب عن كل يوم فى عمرك .. أجيبلك أدلة

قرآن -----> قال الله سبحانه: فَمَنْ يَعْمَلْ مِثْقَالَ ذَرَّةٍ خَيْرًا يَرَه * وَمَنْ يَعْمَلْ مِثْقَالَ ذَرَّةٍ شَرًّا يَرَه [الزلزلة:7-8]

سنة --------> حديث عبد الله بن مسعود رضي الله عنه، أن النبي صلى الله عليه وسلم قال:. (لا تزول قدما عبد يوم القيامة حتى يسأل عن أربع:
-أسألك بالله! أن تتدبرها؛ لتسألها نفسك الآن قبل أن تسأل بين يدي الملك جل وعلا- عن عمره فيما أفناه، وعن علمه ماذا عمل به؟ وعن ماله من أين اكتسبه، وفيما أنفقه؟ وعن جسمه فيما أبلاه؟)

السلف -----> قال الحسن البصري رحمه الله تعالى: يا ابن آدم! إنما أنت أيام مجموعة، فإن مضى يوم مضى بعضك، وإن مضى بعضك مضى كلك

عرفت أهمية كل يوم

معنى كدا ان جميل جدا ان يكون ليك هدف ومراد (أهم حاجة يكون حلال ويكون خالص لربنا )

ودى بدون أدنى مبالغة ممكن تطبقها على كل حركة ليك .. مش هطول فى الموضوع دا بس هاقول آية واحدة من القرآن

( قل إن صلاتى ونسكي ومحياى ومماتى لله رب العالمين ) ودى انا هبقى انزل مواضيع فيها ان شاء الله

المهم نرجع لموضوعنا .. جميل ان يكون ليك هدف سواء بعد شهر او 5 شهور أو سنة او تلات سنين او اربع سنين انشالله عشر سنين

بس أهم حاجة ان من الثانية دى لحد معاد الهدف دا مايتحقق .. منبقاش عايشين ميتين

لان لو فضلنا مأجلين كل حاجة لبعد مانحقق الهدف دا .. هنعيش بقية عمرنا كدا .. ودا مش صح

فلازم نستغل كل يوم فى حياتنا ان شاء الله

وكلمة أخيرة .. انت ممكن اللى حواليك ( أهل - أصحاب - مجتمع ) يفرض عليك حاجات

ويمنعك من حاجات غلط انت بتعملها وهتسيبها بسبب الضغط دا

طب ليه متكونش حياتنا بادينا ونسيب احنا الحاجة دى لو غلط بس عشان خاطر ربنا مش عشان اللى حوالينا

( ومن يتق الله يجعل له مخرجا ويرزقه من حيث لايحتسب )

وساعتها هتحس بقوتك وبقوة إرادتك .. لان ربنا معاك وبيأيدك

وساعتها ربنا هييسرلك ويسخرلك الامور عشان توصل لهدفك

وكمان طول مانت بتسعى لهدفك كل خطوة ليك بحسنة مادام انت مخلص فيها لربنا

وبتسعى انك تحقق الآية القرآنية دى

( قل إن صلاتى ونسكي ومحياى ومماتى لله رب العالمين )

أتمنى الفائدة للجميع وآااااسف جدا على الإطالة

وأسأل الله الثبات لنا أجمعين وإخلاص النية لوجهه الكريم

الله اكبر ما شاء الله موضوع غاية فى الروعة
الله يباركلك و يبارك فيك و ينفع بيك الاسلام و المسلمين
فى كتير فعلا عايشين ميتين ولا ليهم لازمة فى الحياة
ان لم تزد على الحياة فانت زائد عليها
سواء حياتك او حياة اللى حواليك
بجد موضوع اكتر من رائع
بارك الله فيك

كلمة اخيرة حبيت اضيفها و بحبها اوى
من فقد الله ماذا وجد؟!
و من وجد الله ماذا فقد؟!!
و على فكرة برده ربنا سبحانه و تعالى بيسخر مش الامور بس دة البشر كمان
اذا احب الله عبد حبب الناس فيه و مش الناس بس لا دة الملائكة كمان
و من ترك شئ لله عوضه الله باحسن منها
يعنى لو ساب الواحد حاجة حرام رغم انه حاسس انه مش قادر يستغى عنها هيعوضه ربنا سبحانه و تعالى بحاجة احسن منها بكتير يمكن من كتر مهيا خير بالنسبة للانسان ممكن يكون عمره متخيلها بعيدة تمام عن مخيلته انه يحلم بيها حتى
لان ربنا بيحرمك ليعطيك عشان كدا مينفعش الواحد يقول هو ربنا عمل فيا كدا ليه

والله موضوع جميل...ربنا يوفقك وانتا اضافة لينا يا محمد..ثانيا ربنا يوفقكم انتوا الاثنين وبحب روح الود بين الاعضاء...

السلام عليكم
ما شاء الله رائع لانة صادق وطالع من القلب
شكرا على التذكرة دية (كل يوم بيعدى مبيرجعش تانى )
تقبل مرورى .

مبدع NEW عدد الرسائل : 8 تاريخ التسجيل : 15/10/2008

SaRaH

أولا شكرا لمشاركتك الجميلة وكلامك الجميل دا

وفعلا انتى كلامك مظبوط لازم منكونش زيادة على الحياة لان مش دا الصح

وفعلا انتى لخصتى الكلام لما قلتى من وجد الله ماذا فقد ؟

شكرا سارة لردك ونورتيني بمشاركتك الرائعة

===========

The Fox

نورت ياباشا وتسلم على ردك وتشجيعك دا وربنا يقدرنى واقدم اللى اقدر عليه هنا ف المنتدى

=============

Enas

وعليكم السلام ايناس

شكرا ياايناس على ردك الجميل وربنا ينفعنا واياكى وهوه فعلا طالع من القلب

نورتى ياايناس